ବରପାଲି – ବରପାଲି ବ୍ଲକ ଆଗଲପୁର ଅଞ୍ଚଳର ବିଭିନ୍ନ ଗ୍ରାମରେ ପୁଲିସ ଦ୍ବାରା ଖାନତଲାସି ହୋଇ ବ୍ୟାପକ ପରିମାଣର ମହୁଲ ପୋଚ, ରନ୍ଧାମଦ ଜବଦ କରିବା ସହ ରନ୍ଧାଶାଳା ମାନ ଭାଙ୍ଗି ଦିଆଯାଇଛି | ଶୁକ୍ରବାର ଅପରାହ୍ନରେ ବରପାଲି ଥାନାଧିକାରୀ ଜୟାରସ୍ମୀ ସେଠୀଙ୍କ ନିର୍ଦ୍ଦେଶରେ ପୁଲିସ ବାହିନୀ ଆଗଲପୁର ସୀମାନ୍ତ ଅଞ୍ଚଳରେ ଚଢ଼ଉ କରିଥିଲା | ରକ୍ସା ପଞ୍ଚାୟତର ବିଭିନ୍ନ ସ୍ଥାନରେ ପୁଲିସ ଅତର୍କିତ ଭାବେ ପହଞ୍ଚି ନିଛାଟିଆ ସ୍ଥାନରେ ରହିଥିବା ବାହାଲ ଜମି ଓ ବଣୁଆ ବୁଦା ଉହାଡ଼ ମାନଙ୍କରେ ପ୍ରସ୍ତୁତ ହେଉଥିବା ରନ୍ଧନଶାଳ ମାନ ଠାବ କରିଥିଲା |
ପୁଲିସ ଆସୁଥିବା ଜାଣିପାରି ରନ୍ଧନ କାର୍ଯ୍ୟରେ ଲିପ୍ତ ଦୁର୍ବୃତ୍ତମାନେ ଘଟଣାସ୍ଥଳରୁ ଫେରାର ମାରି ଦେଇଥିଲେ। ପୁଲିସ ଖାନତଲାସୀ ବେଳେ ମୋଟର ଟ୍ୟୁବ୍ ସହିତ ରନ୍ଧନ କାର୍ଯ୍ୟରେ ବ୍ୟବହୃତ ସାମଗ୍ରୀ, ବସ୍ତା ଓ ରବର ପାଇପ ସହ ୧୦ କ୍ଯୁଣ୍ଟାଲରୁ ଉର୍ଦ୍ଧ୍ବ ମହୁଲ ପୋଚ ସହ ୫୦ଲିଟର ଦେଶିମଦ ଏବଂ ଗୋଟିଏ ବାଇକ ଜବତ କରିଥିଲା | ଅଞ୍ଚଳର ନଦୀ, ନାଳ,ବଣୁଆ ଚାଷଜମି ପାଖରେ ଲୁକ୍କାୟିତ ରହିଥିବା ସ୍ଥାନରେ ପ୍ରସ୍ତୁତ ହେଉଥିବା ଖନ୍ଦା ମାନ ବୁଲିବୁଲି ଭାଙ୍ଗିଥିଲେ।
