ବରପାଲି-ବରପାଲି ୧୪୮ତମ ଶୀତଳ ଷଷ୍ଠୀ ଯାତ୍ରା ମହୋତ୍ସବ ପାଇଁ ଲଗ୍ନ ନିର୍ଦ୍ଧାରଣ କାର୍ଯ୍ୟକ୍ରମ ସମାପନ ହୋଇଯାଇଛି। ବରିଷ୍ଠ ଓ ବିଶିଷ୍ଠ ପଣ୍ତିତ ମାନଙ୍କ ଦ୍ବାରା ଧାର୍ଯ୍ଯ କାର୍ଯ୍ଯକ୍ରମ ଅନୁଶାରେ ଆସନ୍ତା ଏପ୍ରିଲ୩୦ ତାରିଖ ଅକ୍ଷୟ ତୃତୀୟା ତିଥିରେ ଥାଳଉଠା ପର୍ବ ସମ୍ପର୍ଣ୍ଣ ହେବ। ପରେ ଆସନ୍ତା ୨୭ ମଇ ମଙ୍ଗଳବାର ଠାରୁ ଶୀତଳଷଷ୍ଠୀ ଯାତ୍ରା ମହୋତ୍ସଵ ଶୁଭାରମ୍ଭ ହୋଇ ୦୨ ଜୁନ ସୋମବାର ଦିନ ଯାତ୍ରା ମହୋତ୍ସବ ସମାପନ ହେବ ବୋଲି ସ୍ଥିରକୃତ ହୋଇଥିଲା। ସେହିପରି କାର୍ଯ୍ଯସୂଚୀ ଅନୁଯାୟୀ ମଇ ୨୭ ତାରିଖ ଜ୍ୟେଷ୍ଠ ଶୁକ୍ଳପକ୍ଷ ପ୍ରତିପଦାରୁ ଶିବ ବିବାହ ମହୋତ୍ସବ ଶୁଭାରମ୍ଭ ହୋଇ ବାବା କପିଳେଶ୍ଵର ମହାଦେବଙ୍କୁ ଯାତ୍ରା ମଣ୍ଡପକୁ ଆନୟନ ଶୋଭାଯାତ୍ରା ଓ ରାତ୍ରରେ ଭଣ୍ଡାର ଗୃହରେ ସଂସ୍ଥାପନ କରାଯିବ।
୨୮ତାରିଖ ବୈଦିକ ରୀତିରେ ରୁଦ୍ରଯଜ୍ଞ ଶୁଭାରମ୍ଭ ଓ ସନ୍ଧ୍ୟାରେ ଯାତ୍ରା ମଣ୍ଡପରୁ ହିମାଦ୍ରି ନଗରକୁ ଶୋଭାଯାତ୍ରା ବାହାରି ରାତ୍ର ସମୟରେ କନ୍ୟା ମନୋନୟନ ଓ ସ୍ବୀକୃତି(ପତରପେଣ୍ଡି) ପ୍ରଦାନ କାର୍ଯ୍ୟକ୍ରମ ସମ୍ପର୍ଣ୍ଣ ହେବ। ୨୯ତାରିଖ ରାତ୍ରରେ ଭୈରବ ଵାବାଙ୍କ ନିମନ୍ତ୍ରଣ ଭୈରବ ବୁଲା ଶୋଭାଯାତ୍ରା ପରିକ୍ରମା,୩୦ ତାରିଖ ବିଗତ ବର୍ଷର ହିମାଦ୍ରୀ ନଗର ଅଭିମୁଖେ ଶୋଭାଯାତ୍ରା ବାହାରି ଗଣ୍ଠିଆଳ ଫିଟା କାର୍ଯ୍ଯକ୍ରମ ସହ ଭଣ୍ଡାର ଗୃହରେ ତେଲ ହଲଦି,ଅଳଙ୍କାର ଧାରଣ ପାଇଁ ହିମାଦ୍ରୀ ନଗର ପରିସରରେ ଶୋଭାଯାତ୍ର ପହଞ୍ଚିବ।ବରଧରା ପର୍ବ ସମାପନ ପରେ ରାତ୍ର ସମୟରେ ବରଯାତ୍ରା ଶୋଭାଯାତ୍ରା ମାଧ୍ୟମରେ ଶ୍ରୀ ଶ୍ରୀ କପିଳେଶ୍ଵର ବାବାଙ୍କ ବରାନୁଗମନ। ହିମାଦ୍ରିନଗରରେ କନ୍ଯାପକ୍ଷରୁ ବାଟ ବରଣ ପର୍ବ ପାଳିତ ହେବ।
୩୧ ଜୁନ ବିବାହ ପାଣିଗ୍ରହଣ ପରେ ଶିବ ପାର୍ବତୀଙ୍କ ବୈଠକି ଯାତ୍ରା । ଜୁନ ୦୧ତାରିଖ ହାକରାଭାର ଶୋଭାଯାତ୍ରା ସହ ନିମନ୍ତ୍ରଣ ଓ ରୁଦ୍ରଯଜ୍ଞ ପୂର୍ଣ୍ଣାହୁତି ଏବଂ ଜଗତ ଜନନୀ ମା ପାର୍ବତୀଙ୍କ ଶ୍ଵଶୁରାଳୟକୁ ଆଗମନ,ଯାତ୍ରା କମିଟି ପକ୍ଷରୁ ଶତ ଆରତୀ ସମ୍ବର୍ଦ୍ଧନା, ପରେ ଲମ୍ବାନୀ ଶୋଭାଯାତ୍ରା ଓ ଶ୍ରୀ ଶ୍ରୀ କପିଳେଶ୍ବର ବାବା ଓ ଜଗତ ଜନନୀ ମାତା ପାର୍ବତୀଙ୍କ ନଗର ପରିକ୍ରମା । ୨ ଜୁନ ଶିବ ପାର୍ବତୀଙ୍କ ପ୍ରତ୍ୟାବର୍ତନ ଶୋଭାଯାତ୍ରା, ରାଜବାଟି ଠାରେ ମହତି ଭୋଗ ଅର୍ପଣଓ ସନ୍ଧ୍ୟା ସମୟରେ ଶିବ ପାର୍ବତୀଙ୍କ ମନ୍ଦିର ପ୍ରବେଶ ଓ ଯାତ୍ରା ସମାପନ କାର୍ଯ୍ୟକ୍ରମ ହେବ । ଉକ୍ତ କାର୍ଯ୍ୟକ୍ରମରେ ପଣ୍ଡିତ ରବୀନ୍ଦ୍ର ଦାଶ, ଡ.ସରୋଜ କୁମାର ଦାଶ, କୃଷ୍ଣଚନ୍ଦ୍ର ଦେବତା,ପିନାକୀ ଦାଶ,ସଦାନନ୍ଦ ଦାଶ,ହେମନ୍ତ ମିଶ୍ର ଏବଂ। ଯାତ୍ରା କମିଟିର ସମ୍ପାଦକ ଜୟନ୍ତ କୁମାର ତ୍ରିପାଠୀ,ବିନୋଦ ବିହାରୀ ଶୁସାରି, ଚନ୍ଦନ ସାହୁ, ଲିପନ ଦାଶ,ଗୋପାଳ ରାଉତ,ଉତ୍ତମ ସାହୁ ପ୍ରମୁଖ ଉପସ୍ଥିତ ଥିଲେ ।
