ବରପାଲି-ବରପାଲି ୧୪୭ ତମ ଶୀତଳଷଷ୍ଠୀ ମହୋତ୍ସବ ପାଇଁ ଚଳଚଞ୍ଚଳ ବରପାଲି ସହର ହୋଇଉଠିଛି । ସୋମବାର ପୁର୍ବାହ୍ନରୁ ଯାତ୍ରା ମଣ୍ଡପରେ ଦେବାଦେବୀ ଓ ପାର୍ଶ୍ବ ଦେବାଦେବୀ ମାନଙ୍କ ମହାସ୍ନାନ ପରେ ଅମୃତ ମଣୋହି ଲାଗି ହୋଇଥିଲା । ପରେ ଗଣ୍ଠିଆଲ ଶୋଭାଯାତ୍ରା ମଣ୍ଡପରୁ ବାହାରି ନଗର ପରିକ୍ରମା ମାଧ୍ଯମରେ ତହସିଲ ଛକ ପୂଜାମଣ୍ତପରେ ପହଞ୍ଚିଥିଲେ। ଗତ ବର୍ଷର କନ୍ୟା ପିତାମାତାଙ୍କ ଦ୍ବାରା ଗଣ୍ଡିଆଲ ଫିଟା ପର୍ବ ଆରମ୍ଭ ହୋଇଥିଲା । ଗତ ବର୍ଷର କନ୍ୟା ପିତାମାତା ରାଜ୍ ଗୋପାଳ ଦାଶ ଓ ମିନତୀ ପତିଙ୍କ ଦ୍ଵାରା ଏହି କାର୍ଯ୍ୟ ସମ୍ପନ୍ନ ହୋଇଥିଲା ।
ପ୍ରବଳ ଗ୍ରୀଷ୍ମ ପ୍ରବାହ ଓ ଗୁଳୁଗୁଳି ସତ୍ତ୍ବେ ବହୁ ମହିଳା ଭକ୍ତମାନେ ଶୋଭାଯାତ୍ରାରେ ବାହାରି ତହସିଲ ଛକରୁ ମାତା ପାର୍ବତୀଙ୍କୁ ପାଲିଙ୍କି ଶୋଭାଯାତ୍ରାରେ ବୋହି ଆଣିଥିଲେ । ଅପରପକ୍ଷେ କପିଳେଶ୍ଵର ବାବା ଯାତ୍ରା ମଣ୍ଡପରେ ପହଞ୍ଚିଲା ପରେ ଭଣ୍ତାରଗୃହ ପ୍ରାଙ୍ଗଣରେ ତେଲହଳଦୀ ପରମ୍ପରା ଆରମ୍ଭ ହୋଇଥିଲା । ଯାତ୍ର।କାରୀ ମାନଙ୍କ ସମେତ ବହୁ ଭକ୍ତ ସାମିଲ ହୋଇ ପ୍ରଭୁଙ୍କ ସାନିଧ୍ଯ ଲାଭ କରିଥିଲେ । ସେହିପରି ହିମାଦ୍ରୀ ନଗରରେ ମଧ୍ୟ ମାତା ପାର୍ବତୀଙ୍କ ତେଲହଳଦୀ ପରମ୍ପରା ଧୁମଧାମରେ ପାଳିତ ହୋଇଥିଲା । ସନ୍ଧ୍ୟାରେ ପ୍ରଥମ ଅଳଙ୍କାର ଧାରଣ ଓ ପାଟମୁଦୀ ଭଣ୍ତାରଗୃହରୁ ଶୋଭାଯାତ୍ରା ବାହାରି ହିମାଦ୍ରି ନଗରରେ ପହଞ୍ଚି ଜଗତଜନନୀ ମା ପାର୍ବତୀଙ୍କୁ ଅଳଙ୍କାର ଧାରଣ କରାଯାଇଥିଲା ।
ରାତିରେ ବାବା କପିଳେଶ୍ବର ଦେବଙ୍କ ବାରାନୁଗମନ ଶୋଭାଯାତ୍ରା ଗଣ ଦେବ,ଦାନବ, ଯକ୍ଷଙ୍କ ଗହଣରେ ବିଭିନ୍ନ ସାଂସ୍କୃତିକ କାର୍ଯ୍ଯକ୍ରମ ସହ ବାହାରିଥିଲା। ସନ୍ଧ୍ୟା ସମୟରେ ବିଭିନ୍ନ ମୂଖ୍ଯ ଛକ ମାନଙ୍କରେ ମନୋରଞ୍ଜନ କାର୍ଯ୍ୟକ୍ରମ ମାନ ପରିବେଷଣ କରାଯାଇଥିଲା | ହାଇସ୍କୁଲ ପଡିଆରେ ହେଉଥିବା ନଟରାଜ ମହୋତ୍ସବରେ ବିଭିନ୍ନ ସାଂସ୍କୃତିକ ଓ ମନୋରଞ୍ଜନ କାର୍ଯ୍ୟକ୍ରମ ମାନ ପଦର୍ଶିତ ହୋଇଥିଲା। ତାରକାସୁର ଦରବାର ମଧ୍ୟ ବେଶ ଲୋକାରଣ୍ୟ ଥିଲା । ତାରକାସୁର ଭୂମିକାରେ ଗୋଲାପ ଦାଶଙ୍କ ଅଭିନୟ ଦର୍ଶକ ପସନ୍ଦ କରିଛନ୍ତି ।
