ପଦ୍ମପୁର-ସାଧାରଣ ନିର୍ବାଚନର ଚୂଡାନ୍ତ ଫଳାଫଳ ପ୍ରକାଶ ପାଇବା ପରେ ପଦ୍ମପୁର ନିର୍ବାଚନ ମଣ୍ଡଳୀରୁ ବିଜୟ ଲାଭ କରିଥିବା ବିଜୁ ଜନତା ଦଳର ପ୍ରାର୍ଥୀନୀ ଶ୍ରୀମତୀ ବର୍ଷା ସିଂ ବରିହା ପବିତ୍ର ତୀର୍ଥ କ୍ଷେତ୍ର ଶ୍ରୀ ଶ୍ରୀ ନୃସିଂହନାଥ ମହାପ୍ରଭୁଙ୍କ ମନ୍ଦିର ନିକଟରେ ଅବସ୍ଥିତ ଜଗତ ଜନନୀ ମାଁ ବିନ୍ଧ୍ୟବାସିନୀଙ୍କ ମନ୍ଦିର କୁ ନିଜର ଶ୍ବଶୁର ପୂର୍ବତନ ବିଧାୟକ ଶ୍ରୀ ରମା ରଞ୍ଜନ ବଳିୟାର ସିଂ ଙ୍କ ସହିତ ପହଞ୍ଚି ମାଁ ଙ୍କ ପବିତ୍ର ଦର୍ଶନ କରିଥିଲେ । ମାଁ ଙ୍କ ମନ୍ଦିର ପ୍ରାଙ୍ଗଣ କୁ ବିଧାୟିକା ପହଂଚିବା ପରେ ବିଂଝାଲ ସମାଜର ସଭାପତି ଓ ସମାଜର ଅନେକ କର୍ମକର୍ତ୍ତା ମନେ ବିଧାୟିକାଙ୍କୁ ସମାଜର ରୀତିନୀତି ଅନୁସାରେ ସ୍ୱାଗତ କରିବା ସହିତ ମନ୍ଦିରକୁ ପାଛୋଟି ନେଇଥିଲେ ।
ମାଁ ଙ୍କ ପୀଠରେ ସମାଜ ତରଫରୁ ଏକ ସ୍ୱତନ୍ତ୍ର ପୂଜାର ଆୟୋଜନ କରାଯାଇଥିଲା । ଜଗତ ଜନନୀ ମାଁ ଙ୍କୁ ପ୍ରଣାମ କରିବା ପରେ ବିଧାୟିକା ସମାଜର ସମସ୍ତ ଗୁରୁଜନ ଓ ଉପସ୍ଥିତ ମାଁ ଭଉଣୀ ମାନଙ୍କୁ ପ୍ରଣାମ କରିବା ସହିତ ସେମାନଙ୍କୁ ଏହି ବିଜୟ ପାଇଁ କୃତଜ୍ଞତା ଜଣାଇଥିଲେ । ସନ୍ଧ୍ୟା ସମୟରେ ପାଇକମାଲ ବିଜୁ ଜନତା ଦଳ ତରଫରୁ ପାଇକମାଲ ପୂର୍ତ୍ତ ବିଭାଗର ଡାକବଙ୍ଗଳା ନିକଟରେ ଭବ୍ୟ ସ୍ୱାଗତ ସତ୍କାର କରାଯାଇଥିଲା । ଏହାପରେ ଅନେକ ସ୍ଥାନୀୟ ବାସିନ୍ଦା ବିଧାୟିକାଙ୍କୁ ପୁଷ୍ପଗୁଚ୍ଛ ପ୍ରଦାନ କରି ଶୁଭେଚ୍ଛା ଜଣାଇଥିଲେ ।
ସନ୍ଧ୍ୟା ସମୟରେ ସ୍ଥାନୀୟ ଲୋକଙ୍କୁ ଧନ୍ୟବାଦ ଜଣାଇବା ପାଇଁ ଦଳୀୟ କାର୍ଯ୍ୟକର୍ତ୍ତା ମାନେ ବିଧାୟିକା ନେଇ ଏକ ଶୋଭାଯାତ୍ରାରେ ବାହାରି ପାଇକମାଲର ବିଭିନ୍ନ ପଡ଼ା କୁ ଯାଇ , ତାଙ୍କ ଉପରେ ଆସ୍ଥା ପ୍ରକଟ କରିଥିବାରୁ ସମସ୍ତ ଅଞ୍ଚଳ ବାସୀଙ୍କୁ ଧନ୍ୟବାଦ ଜଣାଇଥିଲେ । ଏହି କାର୍ଯ୍ୟକ୍ରମରେ ପାଇକମାଲ ବିଜୁ ଜନତା ଦଳର ବ୍ଲକ ସଭାପତି ଶ୍ରୀ ରାଜେନ୍ଦ୍ର ରାଉତ , ଯୁବ ସଭାପତି ଗୌତମ ସିଂ , ବରିଷ୍ଠ ଶ୍ରୀ ହୃଦାନନ୍ଦ ବାରିକ ଓ ବହୁ ସଂଖ୍ୟାରେ ଦଳୀୟ କାର୍ଯ୍ୟକର୍ତ୍ତା ଓ ସଧାରଣ ଲୋକ ସାମିଲ ଥିଲେ ।
