ଅତାବିରା(ସୁରେନ୍ଦ୍ର କଠାର)-ଅତାବିରା ବ୍ଲକ ଅନ୍ତର୍ଗତ ଦେବାହାଲ ସ୍ଥିତ ସେବାଶ୍ରମ ସ୍କୁଲ ପରିସରରେ ଏକ ବୃକ୍ଷରୋପଣ କାର୍ଯ୍ୟକ୍ରମ ଅନୁଷ୍ଠିତ ହୋଇଥିଲା l ସେବାଶ୍ରମର ଭାରପ୍ରାପ୍ତ ପ୍ରଧାନ ସେବିକା ବିଜଲୀ ବାଗଙ୍କ ନେତୃତ୍ୱରେ ଅନୁଷ୍ଠିତ ଏହି କାର୍ଯ୍ୟକ୍ରମରେ ଛାତ୍ରଛାତ୍ରୀ ମାନେ ବିଦ୍ୟାଳୟ ପରିସର ଏବଂ ଏହାର ଆଖପାଖ ସ୍ଥାନ ଗୁଡିକରେ ବୃକ୍ଷରୋପଣ କରିଥିଲେ l ସେବାଶ୍ରମର ମୋ ସ୍କୁଲ ଅଧ୍ୟକ୍ଷ କାଶୀଶ୍ୱର ବେହେରା ଛାତ୍ରଛାତ୍ରୀ ମାନଙ୍କୁ ବୃକ୍ଷରୋପଣର ଉପକାରିତା ବିଷୟରେ ବୁଝାଇଥିଲେ l ବୃକ୍ଷରୋପଣ ପାଇଁ ଛାତ୍ରଛାତ୍ରୀ ମାନେ ବେଶ ଉତ୍କଣ୍ଠା ପ୍ରଦର୍ଶନ କରିବା ସହିତ ବିଦ୍ୟାଳୟର ସବୁ ହତା କଡ଼ ରେ ଗଛ ଲଗାଇଥିଲେ l
ରବିବାର ଥିବା ସତ୍ୱେ ଛାତ୍ରଛାତ୍ରୀ ମାନେ ଗଣବେଶ ପରିଧାନ କରି ଏହି କାର୍ଯ୍ୟକ୍ରମର ମାନ ବଢ଼ାଇଥିଲେ l ମୋ ସ୍କୁଲ ଅଭିଯାନ ପକ୍ଷରୁ ବିନୟ କୁମାର ସାହୁ ଛାତ୍ରଛାତ୍ରୀ ମାନଙ୍କୁ ସେମାନଙ୍କ ଦ୍ୱାରା ଲଗାଯାଇଥିବା ଗଛର ଯତ୍ନ ନେବା ପାଇଁ ପ୍ରତିଜ୍ଞା କରାଇଥିଲେ l ହୀରାକୁଦ ଉଚ୍ଚ ବିଦ୍ୟାଳୟର ହିନ୍ଦୀ ଶିକ୍ଷିକା ପ୍ରଜ୍ଞା ସାହୁ, ଦେବାହାଲ ଗ୍ରାମର ଅରୁଣ ପ୍ରଧାନ, ନିତିନ ଭୁଏ ପ୍ରମୁଖ ଏହି ବୃକ୍ଷରୋପଣ କାର୍ଯ୍ୟକ୍ରମରେ ସହଯୋଗ କରିଥିଲେ l ଶେଷରେ ଭାରପ୍ରାପ୍ତ ପ୍ରଧାନ ସେବିକା ବିଜଲୀ ବାଗ ଧନ୍ୟବାଦ ଅର୍ପଣ କରିଥିଲେ l
