ପଦ୍ମପୁର-ଅଗ୍ରଣୀ ନାଟ୍ୟ ସଂସ୍ଥା ଲୁ ଅନୁକୁଲ୍ୟରେ ଗତ ୨୭ ଓ ୨୮ ଦୁଇ ଦିନ ଧରି ସ୍ଥାନୀୟ ଲୁ ନାଟ୍ୟଶ୍ରମ ପରିସରରେ ଦ୍ଵୀ-ଦିବସୀୟ ଅଙ୍ଗ ମହୋତ୍ସବ ୨୦୨୫ ମହା ସମାରୋହରେ ଅନୁଷ୍ଠିତ ହୋଯାଇଛି। ପ୍ରଥମ ଦିବସରେ ବରିଷ୍ଠ ଆଇନଜୀବୀ ଗୌନ୍ତିଆ କୁମାର ସାହୁ, ମା ସମଲେଇଙ୍କ ଠାରେ ଦୀପ ପ୍ରଜ୍ବଳନ ପୂର୍ବକ ମହୋତ୍ସବର ଉଦ୍ଘାଟନ କରିଥିଲେ। ଲୁ ନାଟ୍ୟ ଅନୁଷ୍ଠାନର ସଭାପତି ମେଜର ଚିତ୍ତରଞ୍ଜନ ଦାସ ସ୍ବାଗତ ଭାଷଣ ପ୍ରଦାନ କରିଥିବା ବେଳେ ସମ୍ପାଦକ ପ୍ରଫେସର କେଶ ରଞ୍ଜନ ପ୍ରଧାନ ବିଶ୍ଵ ନାଟ୍ୟ ଦିବସ ଅବସରରେ ସମ୍ବଲପୁରୀ ଭାଷାରେ ଅନୁଦିତ ବାର୍ତ୍ତା ପଠନ କରିଥିଲେ। ସମ୍ମାନିତ ଅତିଥି ଭାବେ ଶ୍ରୀ ଭଗବାନ ଜୀ ସ୍ଵକୀୟ ମତ ପ୍ରଦାନ କରିଥିଲେ। ନବ ପ୍ରଭାତ ସ୍ୱର୍ଯ୍ୟୋତି କନ୍ୟା ଗୁରୁକୁଳର କନ୍ୟା ମାନଙ୍କ ବେଦ ଧ୍ବନି ସମଗ୍ର ପରିବେଶକୁ ଭାବମୟ କରି ଦେଇଥିଲା।
କେଶ ରଞ୍ଜନ ପ୍ରଧାନଙ୍କ ରଚିତ ଓ ନିର୍ଦ୍ଦେଶିତ ଅଦ୍ଭୁତ ପର୍ବତ ନାଟକ ସେମାନଙ୍କ ଦ୍ଵାରା ପରିବେଷିତ ହୋଇ ବେଶ୍ ଚର୍ଚ୍ଚିତ ହୋଇଥିଲା। ମନୋରଞ୍ଜନ ସିଂ ବରିହା ଓ ଦିଲ୍ଲୀପ ଦେବତା ସେମାନଙ୍କୁ ପ୍ରଶଂସାପତ୍ର ଦେଇ ସମ୍ବର୍ଦ୍ଧିତ କରିଥିଲେ। ପରେ ଜଗନ୍ନାଥ ସେଟ୍ ଙ୍କ ଦ୍ଵାରା ରଚିତ ଓ ନିର୍ଦ୍ଦେଶିତ ନାଟକ ଆଦମ୍ ଖୋର୍ ଲୁ ନାଟ୍ୟ ସଂସ୍ଥାର କଳାକାର ମାନଙ୍କର ଦ୍ଵାରା ପରିବେଷିତ ହୋଇ ବେଶ୍ ଦର୍ଶକ ସ୍ଵୀକୃତି ହାସଲ କରିଥିଲା। ଜୟନାରାୟଣ ତ୍ରିପାଠୀ ଓ ଚନ୍ଦ୍ର ଶେଖର ପୁରୋହିତ କଳାକାର ମାନଙ୍କୁ ସମ୍ବର୍ଦ୍ଧିତ କରିଥିବା ବେଳେ ନାଟ୍ୟକାର ଅଶୋକ ବହିଦାର ଧନ୍ୟବାଦ୍ ଅର୍ପଣ କରିଥିଲେ। ଶେଷ ଦିବସରେ ପୂର୍ବତନ ଶିକ୍ଷକ ତାରା ଚାନ୍ଦ ସାହୁ ଅତିଥି ଭାବେ ଯୋଗଦାନ କରିଥିଲେ।
ଏହି ଅବସରରେ କେଶ ରଞ୍ଜନ ପ୍ରଧାନଙ୍କ ରଚିତ ଘେଁସ ଜମିଦାରଙ୍କ ଉପରେ ଆଧାରିତ ନାଟକ “ଘାଟି” ଦୟାସାଗର ଧରୁଆଙ୍କ ନିର୍ଦ୍ଦେଶନାରେ ଶିଶୁ ବିଦ୍ୟା ମନ୍ଦିରର ଛାତ୍ରୀ ମାନଙ୍କ ଦ୍ଵାରା ଅଭିନୀତ ହୋଇ ଉଚ୍ଚ ପ୍ରଶଂସିତ ହୋଇ ଥିଲା। ଅଧ୍ୟାପକ ସୁଶାନ୍ତ ମିଶ୍ର ଓ ପୂର୍ବତନ ନଗରପାଳ ପ୍ରିତମ ମେହେର କଳାକାର ମାନଙ୍କୁ ସମ୍ବର୍ଦ୍ଧିତ କରିଥିଲେ। ଡକ୍ଟର ସରୋଜ ନାୟକ, ଡକ୍ଟର ସମୀର ମେହେର, କୁଞ୍ଜ ବିହାରୀ ସରାଫ ଓ ଶେଷଦେବ ମେହେର ପ୍ରମୁଖ ନାଟକ ଉପରେ ସମୀକ୍ଷା କରିଥିଲେ।
ମହୋତ୍ସବର ଶେଷରେ ଅଶୋକ ବହିଦାରଙ୍କ ରଚିତ ଓ ନିର୍ଦ୍ଦେଶିତ ନାଟକ “ତୋର ପାର କେ ମୋର ପାହା” ଅବର୍ଣ୍ଣିଗୁଣାର କଳାକାରଙ୍କ ଦ୍ଵାରା ପରିବେଷିତ ହୋଇ ଦର୍ଶକ ମାନଙ୍କର ହୃଦୟକୁ ଛୁଇଁ ଯାଇଥିଲା। ଅଞ୍ଚଳ କଲେଜର ଅଧ୍ୟକ୍ଷ ଡକ୍ଟର ଲଳିତ ମୋହନ ପଣ୍ଡା ଓ ମହୁଲପାଲି ଗୌନ୍ତିଆ ଝସ କେତନ ସାହୁ କଳାକାର ମାନଙ୍କୁ ସମ୍ବର୍ଦ୍ଧିତ କରିଥିଲେ। ରମେଶ ଗୁର୍ଲାଙ୍କ ସଂଗୀତ ନିର୍ଦ୍ଦେଶନାରେ ନାଟକ ଗୁଡ଼ିକ ବେଶ୍ ଉପଭୋଗ୍ୟ ହୋଇଥିଲା। ସମଗ୍ର କାର୍ଯକ୍ରମକୁ ଲୁ ଏବଂ ଅବର୍ଣିଗୁଣାର ସଦସ୍ୟ ମାନେ ପରିଚାଳନାରେ ସହଯୋଗ କରି ମହୋତ୍ସବକୁ ସଫଳ କରିଥିଲେ।
