ବରଗଡ଼-ସ୍ଥାନୀୟ ବିଜୁ ପଟ୍ଟନାୟକ ଟାଉନ୍ ହଲ୍ ଠାରେ ଜିଲ୍ଲା ସ୍ୱାସ୍ଥ୍ୟ ସମିତି, ବରଗଡ଼ ଆନୁକୁଲ୍ୟରେ ଆଶା, ଗାଁ କଲ୍ୟାଣ ସମିତି, ଜନ ଆରୋଗ୍ୟ ସମିତି, ମହିଳା ଆରୋଗ୍ୟ ସମିତି ସମ୍ମିଳନୀ ଅନୁଷ୍ଠିତ ହୋଇଯାଇଛି । ଜିଲ୍ଲାପାଳ ଆଦିତ୍ୟ ଗୋୟଲ୍ ଏହି କାର୍ଯ୍ୟକ୍ରମରେ ସଭାପତିତ୍ୱ କରି ଆଶାକର୍ମୀ ମାନଙ୍କର ଗ୍ରାମାଂଚଳରେ ନିରବଚ୍ଛିନ୍ନ ଭାବେ ପ୍ରଜନନ, ମାତୃ, ନବଜାତ, ଶିଶୁ ଓ କିଶୋର ସ୍ୱାସ୍ଥ୍ୟ, ସଂକ୍ରାମକ/ ଅଣ-ସଂକ୍ରାମକ ରୋଗ, ଜାତୀୟ ରୋଗ ନିୟନ୍ତ୍ରଣ କାର୍ଯ୍ୟକ୍ରମ ତଥା ପ୍ରାଥମିକ ସ୍ୱାସ୍ଥ୍ୟ ସେବା ନିରନ୍ତର ଯୋଗାଇଦେବା ନିମନ୍ତେ ପ୍ରଶଂସା କରିଥିଲେ ।
ଜାତୀୟ ସ୍ୱାସ୍ଥ୍ୟ ମିଶନ୍ ତରଫରୁ ପ୍ରଣୟନ କରାଯାଇଥିବା ମାପଦଣ୍ଡ ଅନୁଯାୟୀ ଗତ ୨୦୨୩-୨୪ ଆର୍ଥିକ ବର୍ଷରେ ୧୨ ଗୋଟି ଗାଁ କଲ୍ୟାଣ ସମିତି, ୫ ଜଣ ଆଶାକର୍ମୀ, ସ୍ୱାସ୍ଥ୍ୟ ଉପକେନ୍ଦ୍ର ସ୍ତରରେ ୧୦ଟି ଜନଆରୋଗ୍ୟ ସମିତି, ସହରାଂଚଳ ସ୍ତରରେ ୩୦ ଗୋଟି ମହିଳା ଆରୋଗ୍ୟ ସମିତିଙ୍କୁ ସ୍ୱାସ୍ଥ୍ୟ ସେବା କ୍ଷେତ୍ରରେ ଉକ୍ରର୍ଷତା ପ୍ରତିପାଦନ ପାଇଁ ଜିଲ୍ଲା ସ୍ୱାସ୍ଥ୍ୟ ସମିତି ପକ୍ଷରୁ ପୁରସ୍କାର ପ୍ରଦାନ କରାଯାଇଥିଲା । ଜିଲ୍ଲା ପ୍ରକଳ୍ପ ପ୍ରବନ୍ଧକ ଗିରିଜା ପ୍ରସାଦ ମିଶ୍ର ବାର୍ଷିକ ବିବରଣୀ ପାଠ କରିଥିଲେ ।
ଅନ୍ୟମାନଙ୍କ ମଧ୍ୟରେ ଜିଲ୍ଲା ମୁଖ୍ୟ ଚିକିତ୍ସା ଓ ଜନସ୍ୱାସ୍ଥ୍ୟ ଅଧିକାରୀ ଡା. ନିରୁପମା ଷଡ଼ଙ୍ଗୀ, ପରିବାର କଲ୍ୟାଣ ଅଧିକାରୀ ଡା. ସୁବାସ ଚନ୍ଦ୍ର ଅଗ୍ରଓାଲା, ଜିଲ୍ଲା ଯକ୍ଷ୍ମା ନିରାକରଣ ଅଧିକାରୀ ଡା. ବିନୟ କୁମାର ବେହେରା, ପ୍ରଶାସନିକ ଅଧିକାରୀ ଆରତୀ ଭୋଇ, ଜିଲ୍ଲା ବିତ ପରିଚାଳକ ରାଜକୁମାର ଗୁପ୍ତା ପ୍ରମୁଖ ନିଜ ନିଜ ଅଭିଭାଷଣର ପ୍ରଦାନ କରି ସ୍ୱାସ୍ଥ୍ୟକର୍ମୀଙ୍କୁ ପ୍ରୋତ୍ସାହିତ କରିଥିଲେ ।
ଦୀପାଂଜଳି ପ୍ରଧାନ ସଭାକାର୍ଯ୍ୟ ପରିଚାଳନା କରିଥିବା ବେଳେ ସୌଭାଗ୍ୟ ରଂଜନ ମିଶ୍ର ଧନ୍ୟବାଦ ଅର୍ପଣ କରିଥିଲେ । ପରେ ପରେ ଆଶାକର୍ମୀ ଓ ଶିଶୁ କଳାକାର ମାନଙ୍କ ଦ୍ୱାରା ସାଂସ୍କୃତିକ କାର୍ଯକ୍ରମ ପରିବେଷଣ କରାଯାଇଥିଲା । ସମ୍ମିଳନୀରେ ବରଗଡ଼ ଜିଲ୍ଲାର ସମସ୍ତ ବ୍ଲକର ଆଶାକର୍ମୀ, ଅଙ୍ଗନଓାଡ଼ି କର୍ମୀ, ଗାଁ କଲ୍ୟାଣ ସମିତିର ସଦସ୍ୟ, ସ୍ୱାସ୍ଥ୍ୟ ବିଭାଗର କର୍ମକର୍ତାମାନେ ଯୋଗ ଦେଇଥିଲେ ।
