ପାଇକମାଲ-ବରଗଡ଼ ଜିଲ୍ଲା ପାଇକମାଲ ବ୍ଲକ ମାଣ୍ଡିଆଡ଼ିପା ଗ୍ରାମ ପଞ୍ଚାୟତ ଅନ୍ତର୍ଗତ ବଇଦପାଲି ନୁଆଗାଁ ଗ୍ରାମର ଜଣେ ଯୁବକ ନିଜ ଘରେ ନିଜ ବେକରେ ଦଉଡ଼ି ଲଗାଇ ଆତ୍ମହତ୍ୟା କରିଥିବା ଜଣାପଡିଛି । ପ୍ରାପ୍ତ ସୂଚନା ଅନୁଯାୟୀ ବଇଦପାଲି ନୂଆଗାଁର ସନ୍ତୋଷ ବାଗ (୪୬) ଗତ ତିନି ଦିନରୁ ଅସୁସ୍ଥ ରହିଥିଲେ । ଆଜି ଘରେ କେହି ନଥିବା ସମୟରେ ତାଙ୍କ ଶୋଇବା ଘର ଭିତର ପଟୁ ବନ୍ଦ କରି ଛାତରେ ଉପର ପଙ୍ଖା ଲଗାଇବା ପାଇଁ ଥିବା ହୁକ୍ ରେ ଏକ ଦଉଡ଼ି ଦେଇ ନିଜ ବେକରେ ଲଗାଇ ଆତ୍ମହତ୍ୟା କରିଥିବା ଜଣାପଡ଼ିଛି। ତାଙ୍କ ସ୍ତ୍ରୀ ଘରକୁ ଫେରି ବୋଧେ ସନ୍ତୋଷ ସୋଇ ପଡିଛନ୍ତି ଭାବି ବାରମ୍ବାର ଡାକିବା ସହ କବାଟ ବାଡେଇ ଥିଲେ ।
ପରେ ନ ଶୁଣିବାରୁ ଗାଁ ଲୋକଙ୍କୁ ଡାକି କବାଟ ଭାଙ୍ଗି ଦେଖିଲା ବେଳକୁ ସନ୍ତୋଷ ଝୁଲନ୍ତା ଅବସ୍ଥାରେ ରହିଥିଲେ । ଖବର ପାଇ ପାଇକମାଲ ପୋଲିସ ଘଟଣା ସ୍ଥଳରେ ପହଞ୍ଚି ପ୍ରାଥମିକ ତଦନ୍ତ କରିବା ସହ ଶବ ଜବତ କରିଛି । ଏନେଇ ପାଇକମାଳ ଥାନାରେ ଅପମୃତ୍ୟୁ ମାମଲା ସଂଖ୍ୟା ୭/୨୪ ଅନୁଯାୟୀ ଏକ ମାମଲା ରୁଜୁ ହେବା ସହ ଶବକୁ ବ୍ୟବଚ୍ଛେଦ ନିମନ୍ତେ ପଦ୍ମପୁର ଉପଖଣ୍ଡ ଚିକିତ୍ସାଳୟ କୁ ପଠାଯାଇଛି ବୋଲି ସୂଚନା ଦେଇଛନ୍ତି ପାଇକମାଳ ଥାନା ଅଧିକାରୀ ସୁଶାନ୍ତ କୁମାର ବଢେଇ । ପାରିବାରିକ କଳହରୁ ଆତ୍ମହତ୍ୟା କରିଥାଇ ପାରନ୍ତି ବୋଲି ଅନୁମାନ କରାଯାଇଛି ।
